Tema 5: Dossier

Benvidas de novo benqueridas lectoras e lectores!

Hoxe falaremos do que se viu na clase sobre o tema 5, que versa sobre o deseño curricular. Abrimos o tema cun breve debate en minigrupos onde aclaramos o concepto de currículo, enumeramos elementos curriculares, competencias clave e establecemos os graos de concreción curricular. No meu minigurupo falamos sobre as cuestións mencionadas ordenadamente, cada unha daba a súa opinión, engadía nova información ou corrixía a que estaba errada segundo procedese. Finalmente comentamos os resultados co profesor e o resto das compañeiras/os.

En grupos diferentes, deseñamos unha tarefa onde o alumnado traballase tódalas competencias clave: os estudantes deberán organizar a festa de fin de curso e traballarán tódalas CC:

CL	mediante debates para a escolla da temática, elaboración das invitacións…
CMCCT	elaboración e xestión dun orzamento para mercar decoración e comida.
CD	elaboración e envío de invitacións á festa en formato electrónico.
CAA	investigación sobre os costumes e comidas dun país para unha posta en común.
CSC	alumnado organizado en comités, deberán falar entre si para poñer en común as decisións tomadas.
CSIEE	facer realidade as ideas da festa.
CCEC	temática baseada nalgún país de fala inglesa, a comida e as decoracións deberán ir acordes coa temática.

Finalmente traballamos co Kahoot en dúas ocasións diferentes: a primeira de forma individual e a segunda en equipo. O certo é que facer Kahoots a min nunca me resultou cómodo, e malia obter bos resultados e rematar no podio en ambas ocasións, sentía moita presión por errar nas miñas respostas. Isto pode ser debido a que son unha persoa moi pouco competitiva e algo tímida, polo que non me atopo a gusto nese tipo de situacións. Mais debo recoñecer que o Kahoot realizado en pequenos grupos foi moitísimo máis levadeiro ca o individual, como podíamos falar e debater as respostas, non sentía tanta presión nin tanta inseguridade polo medo a ser xulgada.

Por último dicir que malia os meus sentimentos con respecto ós Kahoot, é certo que aprendín moito coa realización das mesmas pois con cada resposta o profesor aclaraba os conceptos, deste xeito, nas seguintes rondas era máis doado avanzar.

Para este tema realizamos dúas presentacións, sempre traballando por equipos e adquirindo coñecementos de forma cooperativa entre as compañeiras e compañeiros. A primeira delas, foi traballada en pequenos grupos que se especializarían nunhas ensinanzas concretas. No meu equipo traballamos sobre o currículo das linguas estranxeiras na Formación Profesional, pero outros grupos traballaron tamén sobre a ESO e o bacharelato. Nestas presentacións debíamos avaliar mediante unha rúbrica o traballo das compañeiras doutro grupo, aspecto moi salientable e complicado. Non resulta nada doado avaliar ás túas compañeiras de clase de forma obxectiva, pero cunha rúbrica resulta algo máis asequible.

A segunda presentación que realizamos versou sobre a EOI e empregando un método cooperativo conseguimos abarcar un temario moi amplo mediante a distribución dos diferentes puntos a cada persoa.

Gustaríame concluír dicindo que o emprego de metodoloxías cooperativas ou grupais son moi útiles, podes abarcar moita materia en pouco tempo e permitir que sexa o propio alumnado quen protagonice a súa propia aprendizaxe.

Espero que vos gustase esta entrada. Ata a próxima!