Tema 6: Dossier

Benvidas de novo benqueridas lectoras e lectores!

Hoxe vouvos comentar e amosar as actividades que realizamos durante o tema 6 da materia de Linguas Estranxeiras no Contexto nacional e internacional.

O noso primeiro contacto co temario foi unha explicación, por parte do docente, sobre os elementos que compoñen unha programación e do que é necesario ter en conta para elaborar unha de cara ás oposicións. Tamén se nos explicaron os requisitos e os puntos que se dan a maiores nas oposicións e amosóusenos a rúbrica coa que se avalían as programacións, analizando de forma pormenorizada cada un dos seus apartados.

Así demos paso á primeira actividade: avaliar, en minigrupos unha programación real dunha materia e curso específicos, xa sexan da Educación Secundaria Obrigatoria (ESO), do bacharelato, da Formación Profesional (FP) ou da Escola Oficial de Idiomas (EOI). O meu equipo decantouse pola programación de 2º de bacharelato da materia de inglés do IES As Barxas. Tras escoller a programación a analizar, elaboramos un documento onde recollemos a análise pormenorizada que facemos dos elementos que conforman a devandita programación e analizamos, asemade, se cumpre cos criterios de avaliación mínimos establecidos para as oposicións. Elaboramos tamén unha presentación que acompañase a nosa exposición oral na clase, na que explicamos que a programación escollida non cumpre cos mínimos establecidos polos criterios de avaliación para as oposicións. Deixo por aquí a presentación por se lle queredes botar un ollo á nosa análise! J

Presentación en Canva:

Esta actividade foi moi interesante pois valeu para ver de forma práctica como se elaboran as programacións nun centro real e determinar por nós mesmos como a queremos realizar. Persoalmente, sorprendeume enormemente ver que as programacións fosen tan diferentes entre centros (e mesmo nun centro en concreto, se me apuras) e que non seguisen as pautas xerais que se establecen para as oposicións.

Por último, o docente propúxonos ó alumnado unha actividade onde teríamos que crear unha programación didáctica de inglés para o curso de 4º de ESO. Para a realización desta última actividade, dividímonos en minigrupos para repartir os diferentes apartados e así traballar de forma conxunta nun mesmo documento de drive. No meu minigrupo tocounos abordar os elementos transversais, as actividades extraescolares, o plan lector, as conclusións e as referencias bibliográficas. Os obradoiros de teatro, e os clubs de lectura e de cine para a visualización e comentario de obras en inglés parecéronnos boas ideas para incluír no apartado das actividades extraescolares. Para o plan lector, ofrecemos unha variedade de libros en inglés que se adapten a diferentes gustos e niveis para que o alumnado poida escoller a opción que mellor se adapte a si mesmo. Con respecto ás conclusións e ás referencias bibliográficas, foron dous apartados que quedaron incompletos, pois requerían a lectura de todo o traballo dos compañeiros e que nalgúns casos, tampouco remataran as súas partes do traballo. Foi unha mágoa non poder desenvolver esta actividade por completo, pois penso que tería sido unha actividade moi interesante, mais a falta de tempo imposibilitou a realización por completo da mesma.

Espero que cos gustase esta entrada. Ata a próxima!