Didáctica das Linguas Estranxeiras - Tema 3

     Benvidas de novo benqueridas lectoras e lectores!

Na entrada de hoxe imos ver un dos temas de maior interese: o deseño de actividades para o noso alumnado. Imos falar de todo tipo de actividades, hainas de mediación, de comprensión, de expresión e de interacción (tanto orais coma escritas) e que ademais foron realizadas durante as sesións, pois como mellor se aprende é facendo.

Comecemos por falar sobre a mediación, mais antes de meternos de cheo coas actividades expliquemos un pouco en que consiste mediar. O Companion Volume recolle un montón de información sobre este termo. Segundo a definición das compañeiras recollida no glosario (tendo como referencia o Companion Volume que mencionamos antes) a mediación é «unha actividade de adaptación e reformulación da lingua mediante a que un usuario desa lingua fai posible a comunicación lingüística, xa sexa oral ou escrita, entre dúas ou máis persoas que son incapaces de comunicarse entre si directamente polo motivo que sexa. Pode ser intralingüística de producirse dentro do mesmo idioma ou interlingüística entre dous idiomas diferentes».

    Para poñer en práctica esta nova información, alén de analizar unha serie de actividades propostas pola docente en grupos reducidos, realizamos a nosa propia actividade atendendo ás necesidades e estratexias precisas seguindo o MCER. Para comezar, unha actividade de mediación debe cumprir un propósito comunicativo real. Isto é moi importante, pois o alumnado debe ver con que finalidade está a facer esa tarefa, se non, considerará que non lle é útil e acabará por non aprender demasiado, por non dicir nada. Tamén cómpre establecer uns obxectivos e criterios claros para que o alumnado saiba como acadar bos resultados. É importante aproveitar o tempo na aula para realizar o maior número de actividades de comprensión e produción oral posibles, pois esta non a practican na casa coma a comprensión e produción escritas.

Tendo en conta o que vimos de mencionar o meu grupo deseñou unha actividade titulada Travelling in times of COVID!. Como o seu propio nome indica, o tema xira ó redor desta enfermidade que tanto nos está a afectar. O alumnado actuará como un axente mediador explicándolle ós avós británicos dun dos alumnos da aula que precaucións se deben tomar á hora de viaxar nos tempos que corren e as medidas de seguridade que deben seguir. Para conseguir o seu propósito deberán traballar en equipo, primeiro en grupos pequenos e logo en gran grupo. Deberán resumir coas súas propias palabras unha infografía do ministerio de sanidade que posteriormente traducirán. Cada compoñente do grupo terá un rol específico (voceiro, experto, buscador, secretario e moderador) e desempeñará as súas funcións en momentos chave para favorecer unha boa comunicación. Se queredes saber máis, déixovos aquí un enlace para acceder á nosa actividade, na que explicamos de forma pormenorizado o que o alumnado vai facer e como o fará.

A seguinte actividade que realizamos foi unha de comprensión oral, titulámola The Thanksgiving Slap. Esta actividade baséase na visualización do tráiler dun capítulo da seria americana How I Met Your Mother.

No noso caso, deseñamos tres tipos de actividades que clasificamos en actividades de pre-comprensión, actividades de comprensión durante a escoita e actividades de post-comprensión. As actividades de pre-comprensión introducen a temática do vídeo. As que teñen lugar durante a escoita consisten nunha escoita extensiva (en primeiro lugar) e intensiva mentres o alumnado cubre un fill in the gaps e a docente detén o vídeo en puntos clave. Finalmente, as que teñen lugar tras a visualización do vídeo consisten na tradución de tres termos inventados e no uso do pensamento crítico do alumnado. Malia seren boas actividades o nivel que escollemos era moi baixo polo que esta actividade estaría mellor para alumnado cun nivel C1. Por se a queredes poñer en práctica déixovos por aquí a actividade que deseñamos de forma detallada.

    Finalmente, traballamos sobre as actividades de expresión e interacción oral e escrita. Como as escritas adoitan consumir demasiado tempo durante as sesións, nas aulas adóitase explotar o tempo para fomentar as actividades de expresión e interacción oral. Tamén é certo que de cando en vez debemos realizar algunha escrita para comprobar que o alumnado non ten moitas dificultades e que seguen as instrucións dadas pola docente. Centrándonos agora na parte oral, é vital fomentar a conversa libre nas aulas e centrarse máis ben na capacidade para expresarse e non tanto nos erros gramaticais que se podan cometer. Deste xeito o alumnado terá máis oportunidades para falar nas aulas e acabarán perdendo o «medo» que poidan ter á hora de comunicarse. Verás como acaban falando polos codos! Para comprobar que actividades poden ser interesantes na posta en práctica, por grupos, cada persoa lía un artigo que recollía varias destas actividades que fomentan a comunicación na aula e logo lla explicaba ó resto dos compañeiros. No meu grupo eu propuxen a que máis curiosa me pareceu da listaxe que se me deu. Chámanlle a Three picture story, para coñecela mellor podedes premer aquí e coñecer así os detalles.

En resumo, este tema resultou ser o que máis interesante me pareceu. Mediante a realización das diferentes actividades e o feedback (aspecto de gran importancia, como veremos na próxima entrada) da docente conseguín aprender a deseñar diferentes tipos de actividades. É obvio que inda teño moito camiño que percorrer e moitas actividades que deseñar pero a achega que se fixo a este tema foi da mellor forma posible. Complementouse a teoría con diferentes exemplificacións prácticas onde puidemos comprobar por nós mesmas todo o traballo previo que hai detrás das actividades. Espero que aprendésedes tanto coma min! Para calquera dúbida, xa sabedes como poñervos en contacto. Ata a próxima! J